كل ما تريد معرفته عن الرومات المعدلة | أنواعها | تحميلها | مشاكلها

الرومات المعدلة

-------------------

-----------

------

---

-

.

أنواع للرومات المعدلة

التقنية عالم مليء بالحيوية الدائمة  وفيه ع طول شي جديد ,, من ضمن الشغلات الرائعة في عنا الرومات المعدلة custom rom يلي بنظري تعتبر من اروع التحولات بتاريخ الأندرويد ..

قبل كل شي اذا معك ايفون روح من هون مالك شغل xD

#طيب شو هوي الروم المعدل ؟

قبل هاد لازم تعرف شو هوي الأندرويد .


أندرويد هوي نظام تشغيل للأجهزة الذكية مبني أساسا على نظام اللينوكس يلي هوي بالاساس نظام مفتوح المصدر يعني هوي نظام متاحة فيه الشيفرة المصدرية وقابل للتعديل والتخصيص ع كيف المطور ...
هلق بتقلي فيني عدل بالانظمة مغلقة المصدر متل iOS او ويندوز وخصصو ع كيفي !
طيب انت شكلك ما فهمت الفكرة انا بقصد بالتعديل يعني تعديل السورس كود انك تغير بنية النظام ونواتو وهاد شيء ممنووووع بالويندوز وطبعا ممنوع بالـ iOS
بما انو اللينوكس يلي اساسا مبني عليه الاندرويد نظام مفتوح المصدر اذا الاندرويد هوي نظام مفتوح المصدر كمان .. وبالتالي فيني اخد نظام الاندرويد وعدل عليه ع كيفي متل ما هنن اخدو نظام لينوكس وعدلو فيه ع كيفن :3


هلق منجي للروم المعدل xD


اول شي شو الروم ؟
الروم هوي باختصار النظام يلي بيشتغل فيه جهازك كيف مثلا اللاب عندو ويندوز انتا عندك اندرويد
الروم يلي بيكون ع موبايلك اول ما تشتريه بيكون هاد الروم الرسمي stock ROM
نظام اندرويد هوي نظام مفتوح المصدر ماشي ؟ يعني اي شخص فيه ياخد ال stock ROM ويعدل عليه وينشرو بعدا "ما بعرف اذا بيقدر يبيعو" ... طيب فرضا انا مطور اجيت حسيت هالروم الرسمي الخاص بجهازي ما عجبني اجيت سحبتو "حرقت الروم" وحطيتو عندي وبلشت عدل عليه مثلا حذفت تطبيقات وعدلت بالنظام وضفت ميزات وهيك .. نتج عندي روم عموما افضل من الروم الرسمي صار اسمو روم معدل "custom ROM" هاد الروم بما اني اساسا اخدت روم رسمي صار اسمو :
Custom ROM Based On Stock
يعني روم معدل مبني على الروم الرسمي



----------
طيب فرضا انا ما عجبني الروم الرسمي اساساااااا "انا كمطور" بروح بجيب نواة روم معدل متل ما بيصير مع شركات متل :
CyanogenMod ,, RR ,, lineage
عمليا هادي الشركات "اذا صح التعبير" عندا Stock ROM خاص فيها بيجو المطورين بياخدو هالنواة وبيعدلو عليها لتصير تناسب جهازك .. مثلا انا مطور موبايلات J5p حبيت اعمل روم معدل لموبايلي يكون CyanogenMod بروح باخد السورس "السورس هوي تقريبا النواة" تبع رومة سيانوجين بالاصدار يلي بدي ياه .. مثلا بدي اعمل رومة كيتكات بروح بجيب سورس رومة الكيتكات الخاصة بجهازي من سيانوجين "الله يرحما :( " وبروح بعدل عليها لتصير تناسب جهاز J5p هيك بكون عملت روم معدل صار اسمو :
Custom ROM Based On CyanogenMod
يعني روم معدل مبني على سيانوجين
ولو اني اخدت سورس RR صار Based On RR



-------------
عموما الرومات المعدلة افضل واخف واسرع للجهاز من الروم الرسمي "مو ع طول" وممكن مثلا موبايلك يوقف دعمو عند الللوليبوب تجي تلاقيلو رومة مارشميلو او حتى نوغا ... هون بدك تميز بين حالتين :
اذا الروم Based On Stock بيكون الروم معدل شكلو بس يعني اذا رومك الرسمي كيتكات والمعدل مارشميلو مارح تقدر تثبت تطبيقات بدا مارشميلو او حتى لوليبوب .. ليش ؟ لانو هوي اساسا اخد سورس لرومة كيتكات فلذلك مارح تقدر تثبت برنامج بدو نظام اعلى من الكيتكات .. ليش ؟ لانو Based On Stock
بينما لو الروم سيانوجين او RR او lineage وموبايلك وقف دعم الروم الرسمي عند الكيتكات وثبتت روم معدل من وحدة من الانواع فوق مثلا لوليبوب او مارشميلو فيك تثبت نظامي اي برنامج بدو نظام اعلى من الكيتكات لهيك الرومات المعدلة سيانوجين و RR افضل من الرومات المعدلة المبنية ع الروم الرسمي بألف مرة بس بالمقابل ممكن يكون المطور مانو شاطر لذلك بيصير الروم الرسمي أفضل من المعدل :(
في فكرة بالروم المعدل ممكن تكون سيئة أو ايجابية "بنظري ايجابية" انو الروم المعدل اذا ما كان* Based on Stock ما بيكون فيه ولا شي من تطبيقات غوغل
لا غوغل بلاي ولا خدمات غوغل ولا شي اسمو com.google هاد لانو صح الروم مفتوح المصدر وع كيفنا منعدل عليه بس تطبيقات غوغل مانا مفتوحة المصدر ومو من حق المطور يدمج برامج الغوغل بتطبيقاتو

والحل !
مافي شي ما الو حل .. بتفوت على غوغل بتكتب Open Gapps بتفوت ع أول موقع بتحمل تطبيقات غوغل المتوافقة مع جهازك وبتثبتا وبوووووم صار عندك خدمات بلاي :3




طيب شي أكيد رح تلاحظ اللاغ (التعليق) بالموبايل من اول ما بتثبت تطبيقات غوغل طيب فيك تعيش بلاها ع فكرة وتحمل تطبيقات من برا الغوغل بلاي وتضحي بتقدمك بالالعاب :(

أكيد open gapps مو بس هيي بتعمل تطبيقات غوغل للرومات المعدلة في كتير احسن منها بس هادي شاملة لكل الانظمة بدءا من الكيتكات 4.4

الحل تبع اللاغ يلي بتسببو التطبيقات رح احكي عنو بفيديو و بوست بالمدونة اذا رب العالمين اكرمني :3

ملاحظة هامة كتير : الروم المعدل دائما بيجي فيو روت الحمدلله يعني مو كل ما بدك تركب روم معدل بدك ترجع تروت الموبايل :)




# كيف منجيب الروم المعدل الخاص بالموبايل !؟

طيب مافي مكان واحد بتلاقي فيه كل الرومات المعدلة متل الرومات الرسمية يلي فيك توصل لكل الرومات الرسمية لكل الاجهزة من خلالا
انا حاكي عن تحميل الرسمي بهالمقال وفي فيديو رابطو بالمقال
تحميل الروم الرسمي لأي هاتف غالاكسي

افضل شي حاليا انك تكتب رقم اصدار جهازك بعدا كلمة Custom Rom XDA بالغوغل وتفوت تشوف الرومات اللي طلعت لجهازك :3

فيك تدور بغروبات الفيس في لكل موبايل غروب فيس فيه مطورين ومستخدمين لهالموبايل برأيي هاد أفضل مكان لتسأل فيه عن المشاكل يلي بتصير معك بالرومات الرسمية والمعدلة والريكفري بيكون فيه المطورين وممكن يساعدك نفس الشخص يلي طورلك موبايلك :3
فيك بهاد الغروب تنشر عن أسئلتك عن الرومات المعدلة والكيرنل لجهازك وأغلب الأحيان بيكون الغروب باللغة الانكليزية

*طيب حبيت الفكرة شو بنزل روم لموبايلي ؟
- انا بجاوبك .. أفضل شي ع الاطلاق رومات سيانوجين مود cyanogenmod 

بعدا عندك رومات  RR يلي اسما Resurrection Remix يلي عم تأثبت جدارتا فعلا


بعدا رومات Lineage 




وبعدا في انواع كتيرة كتير متل Pac Man Rom




 MiUi Rom





وفي شي مية نوع تاني وااااخر شي بتجي الرومات المعدلة المبنية ع الرسمي :3

Custom Rom Based on Stock :)

بالنسبة لتثبيت الروم والريكفري المعدل رح اعمل مقال كامل عن هالموضوع رح يكون اكبر من هاد انشالله :3

المهم ملف الروم بيكون بصيغة zip مو md5 طبعا
وما حدا يتزاكا ويفك ضغطو هاد بينفك ضغطو من الريكفري المعدل فقط مو من خلال اي برنامج تاني "في برامج بس حديث طويـيـيـل"

انشالله يكون عجبكن المقال واذا في شي تعليق عليه تتركولنا ياه تحت :3